السلام عليكم احبتي
اليوم جبتلكم قصه تملخ ضحك وانشالله تعجبكم بس تره ها الضحك موبلاش ..اليضحك يذب 2000 دينار عالميز الاحمر هذا..شفتوه؟؟ اي خوش عبالي مشفتوه امااااااا الميضحك... اوييييييييييييلي اويييييييييييييييييلي يدفع 10000 دينار حتى يتوب وبعد ميعبس .يللللللللله نبدي السالوفه..
يكلك كان ياما كان في عتيك الزمان جان اكو بنيه حبابه واصيله وبت ناس اسمهه سندريلالا خوش بنيه اي والله وجان عدها مرة اب كلش خبيثه للهامه وابوهه خوش رجال من اهل اول خطيه يبيع باتريات قلم بالسوك ومرات يبيع شخاط ولايتات شحن ....بس شلوووون لايتات تبقى ساعتين ولاتطفي ..المهم ذوله مرة ابوها وخوات سندريلالا 3 بس شنو اشكالهن تخرع (يكطعن الخمره من البيت)
المهم
سندريلالا روحي سوي جوزة المولده فصلت
سندريلالا روحي اشتري جبس وكرزات لخواتج من المحل البراس الشارع
سندريلالا روحي جيبلنا لفات كص
سندريلالا روحي اوكفي سره على ابو الصمون
سندريلالا روحي شلعي شتايكر السطح ورجعيه مره لخ
سندريلالا روحي بدلي دهن للمولده
المهم وهاي المسكينه جانت فد حبابه تروح رأسا ولاتفتح حلكها بس من داخلها بودها تكفر بيهم و جانت تسمع اغنية ام كلثوم (للصبر حدود) كلش هوايه بس بعدين ترجع وتكول الله كريم
المهم
فد يوم دتصعد مي بجليكان ابو ال20 لتر دتغسل السطح لان الماطور محترك والمي ضعيف يصنصل وكهرباء مستقره
تجي 9 دقايق وتنطفي 9 ساعت بس الحمدلله زينه
المهم..
جان تلكه بالطارمه فد فانوس تعبان ومزنجر وصاير تنكه بس شنو اجتي عليه فركته........وهوووووووووووب لهناك طلع دخاااان كام ترجع لي وره وتكوم وتوكع وتكوم وتوكع تقريبا فد 15 مره المهم وهوووووووووووب
المفاجأه.....
طلعلها الجني !!!!! من وسط الخان بس شنو هذا الجني صااك بشكل لابس دريس مال ريال مدريد وسوار جلد اسود وحذاء رياضه وشعره مسويه سبايكي وكللهه:
شبيك لبيك اني الجني ليث من الكراده شتريدين اسويلج كولي بس عفيه بسرعه لان ماما دكتلي مسكول ولازم ارجع هسه
كلتله:
عمو جني اريد كهرباء وطنيه 24 ساعه ممكن؟
كلهه:ولج بابا هو اني ساحب 5 امبير للفانوس من المولده مين اجبيبلج وطنيه24 ساعه ؟ادري شنو جني لو وزير كهرباء
كلتله: زين عمو جني اريد قنينة غاز
كللهه: لج اتي شكد فكريه...قنينه غاز شنو؟ شايفتني جايج على حصان لو فانوس؟؟
عمو جني لعد شتكدر تسويلي؟؟
شوفي بابا انتي صغيره ومحرومه ....الامير راح يسوي حفله واهلج كلهم راح يروحون شنو رأيج لواخليج تروحين وهم تتونسين؟
عمو جني اروح كيا لو تكسي؟
غمضت سندريلالا عيونها(والغريب ياجماعه انه من غمضت كلشي مكدرت تشوف وهذا الشي لسه محد لكاله تفسير؟؟) المهم من فتحت لكت نفسها لابسه بدله خرااافيه وحذاء اخر موديل
يعني طلعت صـــــــــــــــــــــــاااااااااااااااااااااااااااااااااااااااااااكه وفدشي مو طبيعي
الجني كلهه الحفله تخلص ب7 ونص موتتأخرين لان علمود منع التجول والوضع خاف اكو عصابات كلهه موتتأخرين وره ال 7 ونص لان وراها تروح الملابس ويختفي الميك اب والجنطه اني بعد معليه كتلج
وصلت سندريلالا لبيت الامير جان مسوي حفله طلع بالسادس 44% وابوه جان يريد يدزه للخارج يدرس لوطبيه لو طب اسنان والله ماادري مو الامير خطيه كلش طموح...المهم معلينا
وصلت سندريلا لكت بالحفله كاظم وحسام الرسام ونصرت البدر وهيثم يوسف ومحمد السالم وعاااااااااالكه والامير اول ماطبت انتبه عليهه الامير وظلوا يسولفون بعدين راحو لعبوا بلي ستيشن وراها اخذهه يلعبون حبل وراها كرة طائره طبعا هي غلبته ونست سندريلا نفسهه وصارت7ونص باوعت على ساعتهه كالت:
هللله انلاصت والله ...سوده ابوجهج سندريلا..
تذكرت وصيةالجني وكالت لازم افلت كامت تركض عالسريع
هذا الامير ظل صافن ميدري شنو السالفه وراها لحكهه: وج تعاي شبيج مو دا حاجيج ولج تخبلتي وج اوكفي مااكدر اركض بيه ربو....اشجابج عليه اليوم؟ منين اطلعتيلي
ولج فضيله ......اقصد سندريلالا ........نسه اسمهه من الخبصه
وكع حذاء سندريلالا بهالوكت شاله الامير طبعا صارت هدووووء وصننننطه الناس كلها تباوع عالامير والحذاء بيده
الامير ظل صافن عالعالم والحذاء بيده ,,,الناس منتظره الامير شراح يســـــــــــــــوي؟؟؟
الامير مصدوم وصورة سندريلالا الحلوه بباله طبعا الموسيقى وكفت والحفله وكفت والناس صافنه عالامير...جان يباوع الامير للناس
وكااااااااااال بصوت واثق:
الشركه الوطنيه العراقيه للصناعات الجلديه-فخر الصناعه الوطنيه
خوماتعبتوااااااااا من الضحك
عطـــــــــــــــــر الـــــــــــورد..
الأربعاء ديسمبر 31, 2014 11:23 pm من طرف 
موضوع: سندريــــــــــــلا 
